O, Suriya ilə bağlı qətnamənin Liviya ssenarisinə səbəb olmayacağını bildirib

BMT Təhlükəsizlik Şurasında Suriyadakı vəziyyət müzakirə edilir. Şura üzvlərinin müzakirəsinə Ərəb Dövlətləri Liqasının planına əsaslanan qətnamə layihəsi çıxarılıb. Layihə Təhlükəsizlik Şurasına Ərəb Dövlətləri Liqasının baş katibi Nabil əl-Ərəbi və Qətərin baş naziri şey Həməd əl-Tani tərəfindən təqdim olunub.

ANS PRESS-in məlumatına görə, ABŞ-ın dövlət katibi Hillari Klinton iclasdakı çıxışında Suriyada vətəndaş müharibəsinə çevrilmək təhlükəsi olan zorakılığı dayandırmaq üçün qətiyyətli tədbirlər görməyə çağırıb. O, bu ölkədə axıdılan qanların məsuliyyətini Bəşər Əsəd başda olmaqla hakimiyyətin daşıdığını bəyan edib. Bununla belə, Hillari Klinton qətnamənin qəbulunun Liviya ssenarisinə - münaqişəyə xarici silahlı müdaxiləyə gətirib çıxaracağı barədə iddiaları təkzib edib. Qeyd edək ki, bu iddia ilə qətnamənin qəbulunun əleyhinə çıxan rusiyalı diplomatlar çıxış etmişdilər.

Ərəb Dövlətləri Liqasının planı Bəşər Əsədin istefasını, səlahiyyətlərin vitse-prezidentə verilməsini və müxalifətin iştirakı ilə yeni hökumətin formalaşdırılmasını nəzərdə tutur.