Google şirkəti cari ilin iyun ayının sonunda və ya iyulun əvvəlində internet vasitəsilə elektron kitabların satışına başlamağı planlaşdırır.

İslam-Azeri.az İnternet Qəzetinin MİNcom-a istinadən verdiyi xəbərə görə, bu sahədə şirkət Amazon, Apple, Barnes&Noble və digər nəhənglərlə rəqabətə qoşulmaq niyyətindədir.

Google tərəfdaş proqramlarının meneceri Kris Palmın sözlərinə görə yeni internet-mağazanın təqdimatı Book Industry Study Group təşkilatının dəstəyi ilə Nyu-Yorkda keçiriləcək. Xatırladaq ki, ilk dəfə Google elektron kitab bazarına olan marağı barədə bir il bundan əvvəl bildirmişdir.

Şirkətdə qeyd edirlər ki, Google Editions adlandırılacaq yeni servis vasitəsilə Google Books layihəsi çərçivəsində mövcud olan rəqəmli kitab surətlərini əldə etmək mümkün olacaq. Bundan əlavə layihənin reallaşdırılması sayəsində kitab satıcıları Google Editions vasitəsilə tərəfdaş sistemlər açaraq satışdan əldə olunan gəlirlərini artıra biləcəklər.

Qeyd edək ki, hələlik şirkətdə rəqəmli kitabların qiymətləri və satıcıların əldə edəcəkləri faizlər təyin edilməyib.

İslam-Azeri.az