Belarus Prezidenti Aleksandr Lukaşenko Ermənistanı işğal edilmiş Azərbaycan ərazilərini azad etməyə çağırıb

Trend-in məlumatına görə, bu barədə Lukaşenko MDB, Baltikyanı ölkələrin və Gürcüstanın Baş Redaktorlar Klubunun üzvləri ilə görüşdə bildirib.

Onun sözlərinə görə, Azərbaycan torpaqlarının işğalı uzun müddət davam edə bilməz. Belarus Prezidentinin fikrincə, Ermənistan-Azərbaycan, Dağlıq Qarabağ münaqişəsinin həlli var. Bu məsələ müxtəlif istiqamətlər üzrə dəfələrlə işlənib, buna görə də münaqişəni qısa müddətə həll etmək mümkündür, lakin tərəflər siyasi iradə nümayiş etdirməlidirlər.

Dekabrın 10-11-də Minskdə 7-ci Avropa və Asiya Media Forumu keçirilir. Forumun mövzusu "Postsovet məkanındakı inteqrasiya prosesləri və yeni media"dır. Tədbirdə MDB, Baltikyanı ölkələr və Gürcüstanın 200-dən artıq qabaqcıl KİV-inin rəhbərləri iştirak edirlər.

Lukaşenko vurğulayıb ki, Azərbaycan Prezidenti İlham Əliyev görüşlər zamanı dəfələrlə bəyan edib ki, konstruktiv şəraitdə danışıqları davam etdirməyə hazırdır.

Belarus Prezidenti, həmçinin qeyd edib ki, Azərbaycanın hərbi potensialının artması təkcə Dağlıq Qarabağ münaqişəsinin mövcudluğu ilə şərtlənməyib.

"Azərbaycan güc deməkdir", - Lukaşenko deyib və əlavə edib ki, Azərbaycan kiçik, lakin böyük diqqətin cəmləşdiyi zəngin ölkədir və Azərbaycan Prezidenti bu şəraitdə təhlükəsizlik baxımından ölkənin imkanlarını genişləndirməyi zəruri hesab edir.

Lukaşenko bildirib ki, buna görə də Prezident İlham Əliyev güclü orduya malik olmaq istəyir